Tiano: 'na chiesulella persa abbasc' 'a Carità.
E tu ca me purtavi sempe 'nsino
Comm''a nu bambiniello arravugliato.

D'argiento erano 'e vvoce d''e bbizzoghe
Ca ripeteva semp''o stesso canto
Fatt''e parole chin'e devozione.
E nu profumo denso che saglieva
'e rosa fin' 'ncopp''a strada nova.

Io camminavo renzo a chella sepa
Fiorita 'e biancospino e asparacere
C''u laccio e biada mmano pe stanà
Lucertule e ramarr' accaurati.

Me ne scennevo assorto chianu chianu
Lungo 'o Savone che murmuriava
E me scetavo sulo si na rana
Zumpanno da vicino me guardava.

Poi stanco e finalmente soddisfatto
Miezz''a nu campo e grano me sdraiavo
Tra 'e spighe verde e 'u russo d''e papavere
Dove nu tatuaggio preparavo.

Tiano: 'na chiesulella vecchia dint''a sta stretta
Addò tu sempe tuorni e nun si morta
Addò pari 'na marunnella c''u rusario
Addò pari 'na culumbella ca nu vola.

(da Il Sidicino - Anno IX 2012 - n. 6 Giugno)