L'INCONTRO 'E TIANO
'A guaglione pure a 'o tiatro d''e pupazze
sentev''e cuntà pe' mmiez''e piazze
ca Garibbalde e Vittorio Emanuele
pe' luvà 'a mieze tutt''e lamentele
a Tiano s'erano ncuntrate,
e chille, ca cu na vranca 'e arresecate
s'era pigliato 'o Regno d''e Burbune,
ll'aveva a 'o rre Vittorio cunzegnate
pe' fa' ll'Italia libbera e une.
Chesta pe' tutte era la parola,
accussì se mparava nfin''a scola,
de tutt''e dduie vantanne onore e grolia
e se leggeva dint''e libbre 'e storia,
addò nce steva pure na figura
'e lloro ca a cavalle,
tra pecure, chiuppe e purtualle,
se stregnevano 'a mana
iusto for''a funtana.
Po' quanne me so' fatte attempatiello
accummenzaie a sentì ch'era na palla,
ca nun nz'erano ncuntrate a Tiano
ma, ricevano, pare a Caianello,
o a cuntrada Catena, a vairano,
e ca u rre aveva fatt''o capuzziello
e Peppe, pe'ammore 'e ll'Italia, 'o pecuriello.
E' robba ca fa' rire si se sente,
ca chilli poste llà nn'erano niente
e a cavallo da nu paese a ll'ato
nce stive sulo ca t'ire girato,
ma po' Tiano era cchiù canosciuto
e fuie llà ca 'o rre fuie accogliuto
e s'è saputo sempe e sprubbecato
ca lincontro 'e Tiano, a Tiano è capitato.
E nfunno mo nun nce ne frega niente
'e sapè quanta metre cchiù nlà overamente
Garibbalde scuntraie stu piemontese
nu poco fauzo e assaie poco curtese,
ca comm'a nu mast''e sanzaria
penzava a fa' cchiù grossa 'a massaria
apprufittanno d''a passione 'e chille stesse
ca se facean'accire pe' ll'Italia
senz'avè nisciun'aut'interesse.
E a pensarce buono po' 'a storia,
comm'a sempe, nfunno è stata aonesta,
ca nce l'ha fatta pavà cara chella boria
facennele buono avascià 'a cresta
e mannanne a fernì a culo nterra
pure casa Savoia dopp''a guerra.
Roma, 30 gennaio 1987
Paolo Cristiano
(da Il Sidicino - Anno XIV 2017 - n. 2 Febbraio) |